ESTORYA NI DON JUAN TEÑOSO ASIN SI NANANG TAL

ESTORYANG SUANOY

AN ESTORYA NI DON JUAN TEÑOSO ASIN SI NANANG TAL

Ni: Dominador N. Marcaida, Jr.

Kaidtong aking sadit pa ako,

Pirme akong ineestoryahan,

bago magturog sa kabanggihan,

Kan sakong si Nanang Tal.

Si Nanang Tal palan,

Natalia Nase an ngaran,

Sa ama ko siya nagpara-ataman,

Duman pa kaidto sa Guinobatan.

Huli sa kasakitan nin buhay,

Kan panahon nin mga hapon,

Binayaan kan ama ko an Guinobatan,

Tanganing magpasiring sa Mambulao.

Kan makadakit na sinda sa Camaligan

An ama ko hale sa Mambulao,

Si Nanang Tal an nagbibisita naman,

Sa ama ko paminsan-minsan.

Haleng Guinobatan si Nanang Tal kaidto,

Siya nagsasakay sa awto kan Alatco,

Pag-abot sa Naga, mapasiring Camaligan,

Tanganing bisitahon an saiyang ataman.

Digdi sa Camaligan masakit gayo

An pagbuhay-buhay  ninda kaidto,

Huli ta nagpupuon pa man sana,

An pagkabuhay bilang pamilya.

Tanganing kami maaling,

Sa mga kasakitan nin buhay,

Ineestortahan kami ni Nanang Tal,

Nin mga estoryang tunay.

Saro kaini iyo an Don Juan Teñoso,

Na iyo an paborito kong gayo,

Huli ta halawigon na entero.

Ako nakakaturog na totoo.

Sosog ki Nanang Tal na estorya,

Duman daa kaidto sa kahadean nin Valencia,

Yaon daa an Hadeng Artos asin Reyna Blanca,

asin si Don Juan Teñoso na aking solo ninda.

Huli ta pinalibre ni Don Juan

An higanteng bihag kan saiyang ama,

Pinalayas siya kaini sa Valencia,

Tanganing magpasiring sa Ungria.

Dara an mapangyaring panyo,

kan higante saiya itinao,

mantang siya nakabalat-kayo,

bilang sarong gurang na tenyoso.

Napadpad si Don Juan Teñoso,

Sa kahadean nin Ungria,

Kun saen siya inasekaso,

nin sarong hardinero.

Nag-abot an aldaw nin pagpapa-agom,

Kan apat na aking daraga ni Hadeng Diego,

Si Don Juan an nakasalo,

Kan Granada ni Flocerfida.

Alagad naanggot si Hadeng Diego,

Sinda pinalayas sa palasyo,

Nagestar sinda sa sadit na kubo,

Kan maboot na hardinero.

Sunod an paglusob kan mga moro,

Kun saen nadaog an manugang na tolo,

Alagad an mga higante iyong nagsaklolo,

Asin sinda tinabangan na gayo.

Sa banketeng hinanda ni Hadeng Diego,

Bilang selebrasyon kan saindang triunfo,

Nagbadong sa prinispe si Don Juan Teñoso,

Digdi an sekreto kan tolong manugang nabisto.

Si Don Juan Teñoso naman pinatawad na,

Kan mga magurang niyang Artos asin Blanca,

Kaya nagibahan sindang maogma,

Kan agom niyang si Flocerfida.

Ini palan estoryang Don Juan Teñoso,

Sarong kanta kun apudon korido,

Ginibo nang pelikula asin sa entablado,

Ginibo pang drama sa mga radio.

Siring man isina-komiks na,

Tanganing mabasa nin iba,

Kaya palan toom na gayo,

Ta si Nanang Tal parabasa kainiyo.

25 Disyembre 2016