SI JUAN ASIN AN BUWAYA SA SALOG NIN BICOL

ni Dominador N. Marcaida Jr. asin Christine Cordez-Monastereal

                Source: http://asianfolktales.unescoapceiu.org/folktales/read/timor_1.htm

Si Juan:

Kaidtong panahon bago pa man masakop kan mga Kastila an satuyang rona,

Digdi sa Pilipinas, sa salog kan Bicol dakul na buwaya an makukua.

An mga buwayang ini darakula asin maiisog.

Mala ngani ta dai pinapalibre na atakihon asin sibaon an mga parasakay sa salog.

 

Igwa ning sarong lugar sa pampang kan salog na an ngaran Katagbakan.

Digdi nakaistar an sarong aki na an ngaran si Juan.

 

Ining si Juan sarong makusog asin maisog na aki.

Pirme siyang nakakasalak sa pagraralaban-laban nin saiyang mga kalahi.

An saiyang minasbad pirmeng nakasukbit sa saiyang habayan.

Dara-dara asin winawasiwas nya saen man siya magduman.

 

Sarong aldaw nakaisip si Juan sa Salog Bicol maglawod.

Mantang nagririnsay, kinakanta niya an mga linya kan mga parasisira sa salog.

Arog kaini an mga letra asin tono:

 

SARO, DUWA, TOLO

Saro, duwa, tolo

Sakay na sa baroto

Kun dai ka tatao,

Magbilang kang tolo.

 

Saro, duwa, tolo

Itulod na ang baroto,

Kapot na sa sagwan

Ta malawod na ako.

 

An Baroto:

 

An saiyang darang baroto duwang katao sana an makakaigo.

Ini halaba asin gibo sa kahoy na magian.

An sarong parasakay na yaon sa hurihan iyo an piloto.

An sarong parasakay na yaun sa dolon iyo an parasagwan.

Alagad ngonian nin huli ta si Juan solo man sanang nakasakay,

Kaya siya sa baroto iyo ang piloto patin man parasagwan.

 

Kan nakaabot na siya sa parteng Cabusao, sa may bukana kan Salog Bicol,

Pasiring sa lawod kan mahiwas na dagat Pasipiko.

May nanumpungan siyang sarong dakulang buwayang nag-iikol-ikol.

An buwaya pasiring harani sa saiyang baroto.

 

An Buwaya

 

Pagkahiling pa sana ni Juan sa buwaya, inapod nya ini sa ngaran na midbid nya.

Nin huli ta sa totoong buhay an taong idto burubuayahun man sana.

Sarong oportunista na maski anong meyoras an mahiling

gusto nya tulos mahagad, makua asin masadiri.

An tataramon na buaya kun ipinapanongod sa gibo kan tawo,

Dai ka pwedeng maglantad kan kayamanan mong tago.

 

Kan pagkiling liwat kan buwaya ki Juan

Garo baga gusto na siyang sakmalon asin lapaon.

  

An pakikipaglaban ni Juan sa Buwaya

 

Nagin listo si Juan kan mahiling nya na paharani ng buwaya

Hinugkot nya tolos an minasbad na nakasukbit sa habayan nya.

 

Dai man tolos naghaloy ta ang buwaya inatake na si baroto ni Juan.

Nahulog si Juan sa salog alagad kapot man giraray an minasbad na mayo na sa sarongan.

Kan sasakmalon na si Juan, itinusok nya an minasbad sa saro kaining mata.

Linagarto, duminugo asin iyong nagin kawsa na ang buwaya mabuta

An buwaya uminatras, duminulag paharayo sa baroto ni Juan.

Poon kaidto mayo na lamang buwayang nag-aatake sa saiyang dalan.

Dai maitago an kaogmahan ni Juan na siya nanggana sa laban.

Kinanta nya giraray an bistadong kanta kan mga parasisira.

Arog kaini an tono asin letra:

SARO, DUWA, TOLO

Saro, duwa, tolo

Sakay na sa baroto

Kun dai ka tatao,

Magbilang kang tolo.

 

Saro, duwa, tolo

Itulod na ang baroto,

Kapot na sa sagwan

Ta malawod na ako.