ROSAL

 

HIDAW PAGKAMOOT

 

SIISAY KA?

 

 IDO TA, BAHUGON TA!

ni Dominador N. Marcaida Jr.

 

Ugali kan ayam na magdulok sa lamesa

Kun nagkakarakan kita;

Iniisip nya kaya seguro na mawitikan

Nin sarong tulang,

O maski dugi man lamang.

 

Pero dai sya pansin

Kan mga sablok sa kakan;

Ta maski tulang na sana

Nginangatngat pa.

 

Iniisip kan ayam

ta dai sya makataram:

“Hoy, sako naman daw yan!

Mayo kamong herak sa ayam!

Sa atyan dai ako mabantay,

Bahala kamong magkagat

Sa mga akyat-bahay!”

dnmjr/08-26-2021

 

 

 RETRATO KAN SALOG

ni Dominador N. Marcaida Jr.

 

Anong sekreto an nahihilom

Sa entero mong pagkahararom;

Sa madiklom mong sirong,

Anong mga yaon nakatalbong.

 

Sarong aga, ako naglalaba

Kan maating monobloc na lamesa,

Sa kusog kan sakong pagkasalya

Napatahaw na gayo siya.

 

Sa kusog kan grabeng sulog,

Lamesa ko nahulog,

Entero siyang luminubog,

Nagtakig ako sa takot.

 

Maski masulog, ako nagmaisog,

Linusong an tubig,

Sa paglaom na masapod.

Alagad dai ko inabot.

 

Suya man si paralaya,

Ta dai nya daa makukua,

Inatong na sa ibang banwa

Pero kun batbat tundag sana daa.

dnmjr/08-20-2021

 

AKO PILING SOLDADOS

 AKO PILING SOLDADOS

(Anonymous)

 

Ako piling soldados ni Kristo,

Na nagtipan sa krus nagsunod;

Sa kristyanong adal nagdadanay,

Minsan pa buhay ko ipapatod (2x).

 

Kan ako bonyagan na omboy pa,

Si padrino ko sako nanuga,

Na ki Kristo ako magdadanay,

Minsan pa buhay ko ipapatod (2x).

ESTORYANG TAWONG LIPOD

ESTORYANG TAWONG LIPOD

ni

Dominador N. Marcaida Jr.

Sarong aga, mantang naglilinig kami nin kusina,

An sakong makuapo nakakua nin lata sa pintura,

Na kinua niya asin sa luwas dinara.

Sinabihan ko syang iapon ta sa paghona ko basura,

Kaya ibinatikal niya sa may parteng libod,

Asin nagpadagos na kaming maglinig nin kusina.

Bigla na sana ining nangaturog, kan hapon na udto,

Na dai niya man dating ginigibo,

Sabi makulog daa an saiyang payo.

Suspetsa kan makuapo ko, duman kaidto sa libod,

Nakaigo daa siya nin tawong lipod,

Dai siya nagpatabi-apo kan an lata itinapok.

Sabi kan albularyong nagbulong saiya,

Kan haputon ko kan tawong-lipod kun anong itsura,

An tawong lipod daa kapareho ta man sana.

Kun an tawong arog ta maniba-iba,

An tawong lipod maniba-ibang klase man daa,

Kan albularyo an sabi pa niya.

Kaya kun sa libod daa magdiyan,

O, kun magbatikal nin anupaman,

Pagpatabi-apo dai paglingawan.

An pagbulong na ginibo, nagpaaso siya sa lana,

Dangan an aki sa duwang sentido linahidan,

Sa duwang kamot pa niya, asin man sa daghan.

Asin kun sa banggi daa kalenturahon pa,

Magkuang artamesang ginumos sa lemoncito,

Asin ihanos sa angog sagkod sa payo.

Gusto ko pa kutanang maghapot

Dapit sa mga tawong lipod,

Alagad an albularyo tikom na an ngimot.

An bikolanong epikong Ibalon palan,

An enot na nagsambit kan mga tawong lipod

Na rasang ginikanan daa ni Baltog.